طرد الأسود ليس من أجل الكتاكيت

كان ياما كان فيه مجموعة من الاسود والكتاكيت بيلعبوا مع بعض من زماااااااان ، وكانوا طول عمرهم احياناً يحبوا بعض واحياناً يكرهوا بعض جداً ، بس الاغلب انهم بيكرهوا بعض او بمعنى اصح الكتاكيت بتكره الاسود ، يمكن عشان هما اقوى منهم او مسيطرين عليهم.

طول عمر الكتاكيت بتحاول تقنع نفسها ان اى كتكوت ممكن يكبر ويبقى مع الاسود فى يوم من الايام عشان يبقى ليهم صوت فى وسط الاسود يعنى ، انما برده فى الاخر الاسود بتنفذ كلامها على الكتاكيت من غير اى مناقشة.

فى يوم من الايام كان فيه مجموعة من الكتاكيت رايحة لمجموعة تانية من الكتاكيت تزورهم وكدة ، بس للأسف وهما رايحين كان فيه نملة غبية قطعت عليهم الطريق وعملوا حادثة كبيرة اوى بسبب النملة دى ، وتسببت فى موت كتير من الكتاكيت دى واصابة الباقى وشوف يا شيخ كل دا بسبب ايه -نملة-.....يوضع سره فى اضعف خلقه.

طبعاً الدنيا اتقلبت والكتاكيت كلها بدأت تصوصو والدنيا بقت كلها "صوصوة" والاسود سمعت واتضايقت جداً وبدأ زعماء الاسود انهم يغضبوا جداً من ده وبدأت الاسود المساعدة ليهم انها تشوف الاسد المسئول والمساعدين ليه عشان تطردهم برة الحديقة وفعلاً طردوا الاسود المسئولة برة الحديقة ودا مش عشان هما مسئولين عن كدة بس ، لأ عشان كمان زعماء الاسود ماينفعش شعبيتهم تقل وسط الكتاكيت فى وقت هما محتاجين الشعبية دى اكتر من اى وقت تانى عشان فيه زعيم من زعماء الاسود ناوى يبقى "مدير الحديقة".

حكم مصر بين السياسة والأمن والعلم وإدارة الأعمال !!!

كلما قاربنا على موعد الانتخابات الرئاسية المصرية سنة 2011 كلما زادت حدة الصراعات فى الاوساط السياسية المصرية والعربية وايضاً العالمية لما لمصر من ثقل سياسى وقوة توازن فى الشرق الاوسط.

نظراً لعدم تجاوز مصر مرحلة البلوغ السياسى الداخلى من نظم انتخابات لقوانين عتيقة غير مناسبة للأوضاع الحالية داخلياً وخارجياً فان الاوساط السياسية المصرية قد حدث داخلها نوع من النشاط الكثيف بين جميع القطاعات والمناصب الحزبية منها والمستقلة وايضاً الاطراف الخارجية التى ليس لها علاقة قوية بالشئون الداخلية المصرية.

هذا النوع من النشاط نتيجة قرب موعد الانتخابات الرئاسية قد خلق "اعلامياً" العديد من الشخصيات منها ما له علاقة بالاوساط السياسية والامنية المصرية والمطبخ الرئاسى ومنها من هو نتيجة طبيعية لرغبة الشعب المصرى فى خلق شخصية جديدة تعبر به مرحلة البلوغ هذه بفكر مختلف و"عصرى".

هذه الشخصيات ابرزها امين لجنة السياسات بالحزب الوطنى واكثر الشخصيات الحائزة على "تسويق اعلامى" قوى جمال مبارك وايضاً محمد البرادعى رئيس الوكالة الدولية للطاقة الذرية والحائز على نوبل للسلام والعالم المصرى احمد زويل الحاصل على جائزة نوبل فى الفيزياء والدبلوماسى البارز عمرو موسى امين عام جامعة الدول العربية والشخصية الغامضة مدير المخابرات المصرية عمر سليمان والمحامي ممدوح رمزي الذي أعلن ترشيح نفسه بالفعل وهو اول قبطى يرشح نفسه للرئاسة المصرية.


ماذا يرى الشارع المصرى فى هذه الشخصيات ليرشحها وبقوة لحكم اهم منصب رئاسى عربى ؟!

جمال مبارك :
متخرج من الجامعة الأمريكية بالقاهرة في مجال الأعمال وحصل على ماجستير [citation needed] في إدارة الأعمال من نفس الجامعة.
وبدأ بالعمل ببنك أوف أمريكا فرع القاهرة ثم انتقل إلى فرع لندن حتى وصل إلى منصب مدير الفرع وهو يعمل بصفة عامة في مجال الإستثمار البنكي.
ثم انضم إلى الحزب الوطنى عام 2000 وشهد العام 2002 صعوده القوي في سلم الحزب بتوليه خطة أمين لجنة السياسات التي تتولى "رسم السياسات" للحكومة، و"مراجعة مشروعات القوانين" التي ستقترحها حكومة الحزب قبل إحالتها إلى البرلمان" وأصبح منذ نوفمبر 2007 تاريخ المؤتمر التاسع للحزب يشغل منصب الأمين العام المساعد وأمين السياسات.
ويرى البعض ان جمال مبارك مؤهل وبقوة لشغل هذا المنصب لتواجده الدائم فى المطبخ السياسى بحكم وضعه فى الحزب الوطنى الحاكم ومنصبه والذى يعتبر فيه جمال ثالث رجل فى الحزب بعد رئيس الحزب محمد حسنى مبارك وامين الحزب السيد صفوت الشريف بينما يرى البعض ان جمال يختلف تماماً عن والده الرجل العسكرى الذى شهد اهم الحروب التى خاضتها مصر وكان من ضمن قاداتها و"شرب" السياسة من كل رؤساء مصر السابقين "عملياً" بينما جمال كلما فعله هو دراسته لادارة الاعمال والادارة لا تكفى لأن يكون سياسى قادر على ان يقود المسيرة السياسية لأهم الاقطاب العربية وهى مصر.

د.محمد البرادعى :
تخرج في كلية الحقوق في جامعة القاهرة سنة 1962 حاملاً درجة ليسانس الحقوق وبدأ حياته العملية موظفًا في وزارة الخارجية المصرية في قسم إدارة الهيئات سنة 1964م حيث مثل بلاده في بعثتها الدائمة لدى الأمم المتحدة في نيويورك و في جنيف.
سافر إلى الولايات المتحدة للدراسة، ونال سنة 1974 شهادة الدكتوراه في القانون الدولي من كلية نيويورك الجامعية للحقوق.
التحق بالوكالة الدولية للطاقة الذرية في سنة 1984 حيث شغل مناصب رفيعة منها المستشار القانوني للوكالة، ثم في سنة 1993 صار مديرًا عامًا مساعدًا للعلاقات الخارجية، حتى عين رئيسا للوكالة الدولية للطاقة الذرية في 1 ديسمبر 1997
في أكتوبر 2005 حصل محمد البرادعي على جائزة نوبل للسلام مناصفة مع الوكالة الدولية للطاقة الذرية ومنحت الجائزة للوكالة ومديرها اعترافا بالجهود المبذولة من جانبهما لاحتواء انتشار الأسلحة النووية.
ويرى الشارع المصرى ان د.محمد البرادعى يصلح لحكم مصر لما له من خبرات علمية وخبرته بالنزاعات الدولية بحكم موقعه فى وكالة الطاقة الذرية وانه قادر على ان يضع مصر باستراتيجية "علمية" واضحة على مصاف الدول المتقدمة نسبياً او على الاقل الدول "النامية".

د.أحمد زويل :
حصل علي بكالوريوس العلوم قسم الكيمياء عام1967 بتقدير امتياز مع مرتبة الشرف
وبدأ الدكتور أحمد زويل مستقبله العملي كمتدرب في شركة "شل" في مدينة الأسكندرية عام 1966 واستكمل دراساته العليا بعد ذلك في الولايات المتحدة حيث حصل علي شهادة الدكتوراه عام 1974 من جامعة بنسلفانيا
ثم انتقل الي جامعة بيركلي بولاية كاليفورنيا وانضم لفريق الأبحاث هناك. وفي عام 1976 .عين زويل في كلية كالتك كمساعد أستاذ للفيزياء الكيميائية وكان في ذلك الوقت في سن الثلاثين
وفي عام 1982 نجح في تولي منصب أستاذا للكيمياء وفي عام 1990 تم تكريمه بالحصول علي منصب الأستاذ الأول للكيمياء .في معهد لينوس بولينج
وفي سن الثانية والخمسين فاز الدكتور أحمد زويل بجائزة بنيامين فرانكلين بعد اكتشافه العلمي المذهل المعروف بإسم "ثانية الفيمتو" أو "Femto-Second" وهي أصغر وحدة زمنية في الثانية, ولقد تسلم جائزته في إحتفال كبير حضره 1500 مدعو من أشهر العلماء والشخصيات العامة مثل الرئيسان الاسبقان للولايات المتحدة الامريكية جيمي كارتر وجيرالد فورد .وغيرهم
وفي عام 1991 تم ترشيح الدكتور أحمد زويل لجائزة نوبل في الكيمياء وبذلك يكون أول عالم عربي مسلم يفوز بتلك الجائزة في الكيمياء منذ أن فاز بها الدكتور نجيب محفوظ عام 1988 في الأدب والرئيس الراحل محمد أنور السادات في السلام عام .1978
ويشغل الدكتور أحمد زويل عدة مناصب وهي الأستاذ الاول للكيمياء ف معهد لينوس بولينج وأستاذا للفيزياء في معهد .كاليفورنيا للتكنولوجيا ومدير معمل العلوم الذرية
وأبحاث الدكتور زويل حاليا تهدف الي تطوير استخدامات أشعة الليزر للإستفادة منها في علم الكيمياء والأحياء, أما في مجال الفيمتو الذي تم تطويره مع فريق العمل بجامعة كالتك فإن هدفهم الرئيسي حاليا هو استخدام تكنولوجيا الفيمتو في تصوير .العمليات الكيميائية وفي المجالات المتعلقة بها في الفيزياء والأحياء
ويرى الشارع المصرى فى زويل قدرته العلمية الفائقة على وضع مصر فى مركز متقدم جداً علمياً بين الدول وحل جميع المشاكل الموجودة بالشارع المصرى والتى تحتاح لشخص بعقلية زويل.

عمرو موسى :
من مواليد أكتوبر 1936 في محافظة الشرقية وهو من عزبة أبو رفاعي تبع لمركز الزقازيق و من اخواته محمد ماهر و خاله ايهاب سمير وحاصل على إجازة في الحقوق من جامعة القاهرة 1957 والتحق بالعمل بالسلك الدبلوماسي بوزارة الخارجية المصرية عام 1958.
عمل مديرا لادارة الهيئات الدولية بوزارة الخارجية المصرية عام 1977 ومندوبا دائما لمصر لدى الامم المتحدة عام 1990 ووزيرا للخارجية عام 1991 وامينا عاما للجامعة العربية عام 2001.
وسبق موسى عددا من الامناء السابقون منهم عبد الرحمن عزام أول امين عام للجامعة فيما كان محمد عبد الخالق حسونة ثاني الامناء منذ الفترة من 1952 إلى 1972 فيما حل محمود رياض ثالث امين للجامعة منذ الفترة من 1972 إلى 1979 .وحل الشاذلي القليبي رابعا كامين عام للجامعة العربية منذ عام 1979 إلى 1990 فيما أصبح الدكتور أحمد عصمت عبد المجيد خامسا منذ الفترة من عام 1991 إلى 2001 ومن ثم عمرو موسى انتخب في عام 2001 إلى الآن .
ويرى الشارع المصرى فى موسى انه اكثر المرشحين قوة ومناسبة للوضع المصرى لما له من حنكة مميزة دبلوماسياً ومعرفته بالكثير من دواخل السياسة المصرية سابقاً بحكم موقعه كوزير خارجية لمصر فى السابق.

عمر سليمان :
رئيس جهاز المخابرات العامة المصرية الحالي
خريج الكلية الحربية بالقاهرة وماجستير في العلوم السياسية من جامعة القاهرة
ورئيس فرع التخطيط العام في هيئة عمليات القوات المسلحة ثم مدير المخابرات العسكرية ثم رئيس جهاز المخابرات العامة المصرية بدءا من 1993 م حتى الآن.
اختير في السنوات الأخيرة مبعوثا خاصا للرئيس محمد حسني مبارك للقضية الفلسيطينية و كان له دور رئيسي وفعال في اتفاق الصلح بين حركة فتح و حركة حماس. كما ظهر اسمه إبان فترة الانتخابات الرئاسية في مصر كثيرا كخليفة متوقع للرئيس مبارك و لكن سنه التي تجاوزت السبعين عاما تضعف من موقفه كثيرا.
ليس هناك معلومات كثيرة متاحة عن اللواء عمر سليمان، الرجل الغامض الذي يقود جهاز المخابرات المصرية منذ 16 عاماً. هذا الرجل، الذي يشغل منصب رئيس أهم جهاز أمني في مصر، رشحته بعض الأوساط الديبلوماسية الغربية والعربية، في معظم الأوقات، لخلافة الرئيس المصري حسني مبارك أو لمنصب النائب الذي لا يزال شاغراً منذ عام 1981 م.

ممدوح رمزى:
عضو الهيئة العليا للحزب الدستورى ولا يوجد له تاريخ سياسى كبير لكنه اثار جدلاً كبيراً فى الفترة الاخيرة لكونه "اول قبطى" يرشح نفسه للرئاسة المصرية ويرى البعض انها "فرقعة" اعلامية متكررة فى كل انتخابات رئاسية وهناك خلافات بين رجال القانون على دستورية ترشيح قبطى نفسه للرئاسة المصرية وهل هو جائز ام لا لكنه فى النهاية لا يعرفه الكثير .


واخيراً ... من هو رئيس مصر القادم اذا ماترشح الرئيس الحالى للانتخابات القادمة ؟!
هل هو جمال مبارك صاحب الفكر "الادارى" وهل يستطع بهذا الفكر ان يصل لشغل منصب هو الاهم فى الوطن العربى ؟!

وهل هو د.محمد البرادعى صاحب الدراسة القانونية والذى قضى اغلب حياته فى المناصب الادارية فى المنظمات الدولية وهل هو قادر على ان يحكم مصر بخبرته فى ادارة المنظمات الدولية ؟!

وهل هو د.احمد زويل صاحب نوبل فى الفيزياء والمستشار العلمى للرئاسة الامريكية وهل يستطع بخبرته العلمية هذه على ادارة الدولة المصرية ؟!

وهل هو عمرو موسى الدبلوماسى الابرز عربياً ودولياً ايضاً وهل يستطع بحنكته السياسية الدبلوماسية الهائلة على وضع مصر على الخريطة السياسية العالمية ؟!

وهل هو عمر سليمان اكثر شخص يحوى اسرار الدولة المصرية وكل خبايا السياسة والدبلوماسية المصريةداخلياً وخارجياً ؟!

وهل هو ممدوح رمزى المحامى القبطى صاحب الفكرة التسويقية الجديدة فى الترشح للرئاسة المصرية وهل هو مجرد "ظاهرة" ؟!

ما هى معايير الحكم المصرية ؟!
ادارياً ام سياسياً ام امنياً ام علمياً ؟!

اقتنع بدينى وخد بامبرز هدية لفترة محدودة ... النميمة العظيمة

بعد التقدم التكنولوجى الرهيب والمنافسة الشرسة كان لازم نعمل عرض يكسر الدنيا ومش عرض واحد بس دول 3 عروض ;)

العرض الاول "اقتنع بدينى وخد USB Modem هدية "

العرض التانى "اقتنع بواحد سماوى وخد عليه واحد ارضى"

العرض التالت "اقتنع باللى انا مقتنع بيه اياً كان وخد بامبرز لمدة شهر مجاناً"

احنا كدة لا ها يقف قدامنا اتصالات ولا غيرها وهناكل السوق والناس كلها ها تجرى ورانا ... ونقول "دلوقتى وقتها"


مصر ام الدنيا ؟!
اه طبعاً مصر المكان والجو والتاريخ ام الدنيا بكل المقاييس ...

الشعب المصرى دا بنى ادمين ؟!
اترك الميكروفون لسيادتك ...

مصر فيها حرية ؟!
مصر كلها فوضى ولسة لحد دلوقتى مش كلنا عارفين نفهم معنى الحرية الحقيقى ومقتنعين ان الفوضى هى الحرية وبنسقف "لنفسنا" عشان عندنا حرية زى امريكا ...
اللى مقتنع اننا زى امريكا فعلاً ياخد عرض البامبرز ويسافر !!!

والله تهريج .. اى حد عايز يتكلم فى الدين مش بيقول انا مقدرش اتعمق فى الدين عشان مش دارسه لأ بيفتى واهو ربنا يسهلها يمكن يقتنعوا بفكرى اللى هوا اصلا انا معرفش هوا ايه !!!


تيجوا نعمل "نميمة"صغيرة كدة بيننا وبين بعض ؟!
محدش يتكلم فى الدين او بمعنى ادق محدش يتكلم فى اعماق الدين والفقه والتفسير لأن كل حد فينا مقتنع بشئ ما عمره ما ها يقدر يغيره بــ "نوت" ولا بكتاب حتى لكن محتاج شئ من جواه يقنعه مش محتاج لينا احنا ... ايه رأيكوا ؟!

ياريت نتكلم فى الدين الصح اللى هوا ازاى نحب بعض وازاى نحترم بعض وازاى نتناقش مع بعض وازاى نوصل مع بعض لحاجة جديدة فى العلوم والثقافة والتاريخ وكل حاجة وازاى نعلم بعض كل حاجة مفيدة لينا وللأجيال الجاية وبكدة ها نلاقى مستقبلنا بيجرى بينا ونبقى انجح بلد فى كل شئ وبرده ها نلاقى علاقتنا بربنا اجمل ما يكون لأننا راضيين عن نفسنا وبنعمل الفروض الدينية وبنحب بعض كلنا يبقى ليه المشاكل ؟!

تيجوا نكمل النميمة ونتجاهل اى حد غير متفقه دينياً ولا ليه علاقة بالعلوم الدينية اصلاً لما يتكلم فى الدين ؟!

هانرتاااااااااااااااااااح من وجع الدماغ وكل واحد ها ينجح بطريقته وها نسيبنا بقى من تخلفنا دايماً واحنا قاعدين نتكلم فى حاجاة فى الماضى واحنا لازم نعيش الحاضر والمستقبل ...

ها تشتركوا معايا فى النميمة دى ؟!

لذا ...

منذ لقائك الاول احببتك بشدة حيث اننى لم اشعر للحظة بحدة فراق بطن امى ، لم أتألم للفراق ولم استسلم لأننى استوعبت كل ما فيكى ، خشيت ان اصبح عبداً لكى ، أتأملك كل ليلة حتى أنام وانتى بداخلى ، لا أخاف ابداً من الحياة لأنك بداخلى دوماً ، ماهذا وقد اوشكت على تقديس شعورى تجاهك ، كل السماء التى تحيطك بنورها وظلها هى سمائى وانتى قمرها ، كلما افكر ان اتحامل عليكى تسقط لعنة حبى لكى لأصالحك قبل ان أفعل ، كل ما تمنيت هو ان احتضنك بداخلى وقد فعلت ، وكل ما تمنيتى هو ان تشعرى بالأمان داخلى وقد فعلت ، لا تعنينى قسوتك بقدر ما اخاف من قسوتى نحوك ، انتى ما اختاره لى القدر لكى اعيش له ويعيش بداخلى وانتى كل ما املك من قوة ومن ضعف ، احبك ولا املك اختيار حبك ايضاً لأنك قدرى ، ارجوك لا تفارقينى لأن فى فراقك فراقى ، لذا احبك يا نفسى

فى هذا الزمن : ان يصفك كل الناس بالأنانى خير الف مرة من ان يصفك القليل بالأحمق

أشـــبــــــــاه ...

ولدت اولاً بصرخة طفل برئ اسعدت الجميع بقدوم سبب جديد لإسعاد البشرية وولدت ثانيةً بنظرة طفل برئ تجاه حبيبته التى لم يستوعب منها الا انها حبيبته...
بكل ما املك من قوة تثير دهشة من حولى اكتب اليكى كلماتى بكل ما املك من ضعف يثير ايضاً دهشة من حولى...

تحول مفهومى للحياة تجاهك وتجاه كل ما تفعليه وتحولتى لموسوعتى الخاصة بى لأتعرف بك على مدخل جديد لتعريف معانى السعادة والحياة وسافرتى بى بعيداً ليس لأبعد الكواكب بل لكوكب لا يعرفه دوننا...
تذكرى لحظات كفرنا بما يسمى بالحب بين البشر الساذج وايماننا بحبنا نحن لأن حبنا ليس ما يستوعبه البشر وتذكرى لحظات لقائنا دائماً وما يظهر علىّ من صمت لا يميزنى امام اى شخص ليس لشئ الا لأننى اقف امامك!!!
كنت اتمنى دوماً ان اصبح جبلاً وان تصبحى زائرة على سفحى وان تضلى طريقك حتى لا تجدى غيرى ليحتضنك وكانت امنية ليس الا !!!
وكنت اتمنى ان نخلق مفهوماً جديداً لكل معنى من معانى الحياة وان نعيش فى عالمنا ولعالمنا الذى لوثته دماء الجهل بالحب والحياة وكل المعانى الراقية لكنه القدر...
ماذا جنيت من حبك ؟!
لا اريد ان اجنى منه الا اننى احبك لكنه ايضاً القدر...
لا ادرى كيف اصبحنا نشعر ان الحلم قد قارب على نهايته وكيف تجرأنا ان نخط النهاية بأيدينا !!!
كيف ستصبح نهايتنا بنفس دماء الجهل الذى كفرنا به وبتعاليمه الساذجة !!!
كيف ؟!
اقولها بكل اسفى وضعفى والمى الشديد اننا اصبحنا من البشر !!!

تقبلى كل اعذارى اذا اخبرتك يوماً ان القدر لن يحتفظ لنا بصورة تجمعنا مرة اخرى...

تذوقت كل معانى الذل والمهانة لأطلب من قوتى وصبرى ان يقفوا بجانبى للحظة لكنهم ايضاً تركونى لأبكى وحدى واردد كلمة واحدة "اصبحت شبه انسان يمتلك بعضاً من اشباه الاحساس"

حملة "تمليط" الشعب المصرى

* زينا زى اى شعب متخلف وحكومة غير قادرة ودولة ضعيفة بيتضحك علينا كتير وحاسين اننا مفيش زينا فى الدنيا والناس كلها بتحسدنا على "هبلنا" ..

* عبقرى الثقافة المصرية وخاربها السيد الفنان / فاروق حسنى راح اليونسكو عشان يورى للعالم كله عبقرية التخريب وازاى تقدر تقعد فى منصبك طول مانتا عايش ويورى للعالم كله وضع مصر الحقيقى وسط العالم وماما امريكا اللى بتحبنا وتموت فينا عملت فينا ايه ودا الطبيعى مش حاجة غريبة ابداً والاتحاد الاوروبى اللى مؤمن ايمان كامل بأهمية دورنا "الاستراتيجى" فى المنطقة وقوتنا العظمى فيها ويورى لكل العالم قدرالثقافة المصرية والانسان المصرى الذى يعشق الثقافة ولا يحيا بدونها !!! وده تمليط !!!

* مصطلح "الوباء الجديد" وكأنها مصاصة جديدة ويتم الاعلان عنها بأسلوب طفولى ساذج ... الوباء ده اثبت للمرة الألف اننا "مهرولين" ومعندناش ادنى شئ من النظام ومسئولين يقولوا ها نأجل الدراسة ومسئولين يقولوا لأ احنا ها نعمل محاضرات عالنت ومسئولين يقولوا لأ احنا ها نعمل السنة فى سنتين ومسئول مزاجانجى شوية يقول لأ بلاها السنة دى ونلغيها ونرتاح والناس برده ترتاح من المصاريف شوية والمدرسين الخصوصيين مش فارقة معاهم كتير ما هما كدة كدة شغالين دروس طالما الدراسة والامتحانات موجودة وشركات الادوية تولعها اكتر وتحذر وتعمل فرقعة عشان الامصال والادوية بتاعة الانفلونزا "العادية" تتسوق ويلا اهى سبوبة وسط الازمة الاقتصادية العالمية ونطلع منها بمصلحة حلوة والتجار الكبار يجيبوا شوية اقنعة صينى ويبيعوا ويدوها تحذيرات برده فى كل حتة عشان الاقنعة تتباع واهى برده سبوبة كويسة وياسلام على شركات المناديل وخصوصاً "الويبس" والديتول وكله كله ها يبيع عشان نقى انفسنا من "انفلونزا الخنازير" وفـ الاخر اصلاً اسباب العدوى بتاعتها زى الانفلونزا العادية بالظبط بس احنا اللى "مش محافظين على النظافة الشخصيةالعادية بتاعتنا" معفنين يعنى ... وده تمليط !!!

* الاختين الحلوين هناء وشيرين بيطلعوا "يردحوا" لبعض على الفضائيات وده يقول دا قاعد مع بنات وده يقول دا شاذ ودا يقول انا معايا فيديو وعرضته قدام الناس ودا يقول دا "ابن وابن" والله حاجة تقرف ... وده تمليط !!!

* نلبس النقاب ولا نقلعه ؟! هو النقاب فرض ولا عادة ولا سنة ولا ايه ؟! وانتوا مالكوا يا كفرة انتوا نلبس النقاب ولا لأ ؟!

دى حرية شخصية يا استاذ ... ازاى اتفتش انا وانا داخلة مكان الناس كلها بتتفتش فيه دى اهانة ... ياعم بلا نقاب بلا بتاع دول شوية ناس دماغها رايحة ومتخلفين ... النقاب دا فرض واللى مش ها تلبسه ها تبقى مكروهة ... اهو البس النقاب شوية واقلعه شوية وعلى حسب بقى ...

والله احنا شعب فاضى ودولة وحكومة وكله كله فااااااااااااضى مش لاقيين حاجة نتكلم فيها وعلى رأى المثل "الفاضى يعمل قاضى" اللى عايز يلبس يلبس واللى مش عايز يلبس عنه ما لبس واللى قواعده انه يفتش الناس يفتش واللى مش عايز يفتش عنه ما فتش برده... وده تمليط !!!

باختصار الشعب المصرى يتعرض لحملة "غبية" "ساذجة" "داخلية" لتمليطه من مبادئه واخلاقه واحساسه وتاريخه ودينه وعلمه وثقافته وكل شئ جميل !!!

"منتهى التخلف والرجعية ان يجلس الشعب المصرى كل يوم امام فضائيات التوك شو ليتحدث فى قضايا اهم اسبابها الفرااااااااغ ولا يهتم بعمله بقدر اهتمامه بمشاهدة فرقعة اعلامية ساذجة"

ويبقى سؤالى المحير : ليه نلبس نقاب لما ممكن نبقى ملط ؟؟

حكاية حضن ... مفهوم جديد للحب

كان اول يوم يشوفها مع اخته لكن ما كنتش اول مرة يحس بيها جواه ولأول مرة فى حياته يحس انه لقى بنت تقدر تجذبه ليها من غير حتى ما تبصله ولا تديله اى اهتمام من ناحيتها ؟!

بدأ يسأل اخته عليها كتير ويعرف عنها كل حاجة وكل تفاصيل حياتها اللى يهمه بس انه يعرفها عشان - وقع فى حبها - وبعد كدة حاول يتكلم معاها بس لسة حاسس انه مش عارف ياخد قلبها على الرغم من انه متأكد انه واخد كل احساسها !!!

هى مكنتش بتفكر فى الحب بس هو كان فيه حاجة بتخليها مركزة معاه وكانت بتستنى كل ماتروح عند صاحبتها (اخته) علشان تلمحه بس .. وبدأ يدق قلبها وحست انه الانسان الوحيد اللى هيقدر يسعدها ويحميها ..
ولما صاحبتها قالتلها انه بيسأل عليها وبيطمن عليها دايما كانت بتبقى فرحانة جداً ونفسها تطمن عليه هى كمان بس كانت بتتقل ..

وفى مرة اتصلت بأخته فى التليفون وبالصدفة رد عليها وسمع اجمل صوت كان ممكن يسمعه فى حياته وسكت كتييير وبعد لما بدأ يتكلم مكنش عارف يقول ايه عشان يوصلها انه بيموت فيها ونفسه بس لو تتكلم معاه شوية ...

اكتشف بعدها انها كنت مغرمة بيه لدرجة غير عادية ومش قادرة توضح دا لأنه مش عارف يوصلها بأى طريقة وهى ما ينفعش تروح تقوله حاجة زى دى ... ووقعوا فى اجمل قصة حب عرفوها هما الاتنين وبقى يطمن عليها كل ثانية وبيخاف عليها جدا .. وهى كانت بتغير عليه أووى وبتتكلم عليه قدام كل الناس وكبر حبهم مابقاش يعدى يوم من غير لما يشوفوا بعض ويتكلموا مع بعض .. وحياتهم ارتبطت ببعض جدا ..بقى صعب أن حد يفرقهم فى الدنيا دى كلها .

لكن يظهر القدر مكنش كاتب لهم انهم يكونوا مع بعض للنهاية وبدأ باباه يقنعه بأن مستقبله مش مع البنت دى خالص ومستقبله مع بنت صاحبة شريكه فى الشغل !!! للأسف
وكان ها يتجنن من فكرة انه ازاى ها يقدر يتخلى عن حبه الوحيد الحقيقى فى حياته واللى لقاه من غير حتى ما يعرف ازاى عشان يساعد باباه انه يمشى مصالحه مع شريكه فى الشغل .

بدأ يخضع للأمر الواقع اللى مش ها يقدر يغير فيه اى حاجة ويسمع كلام باباه غصب عنه بس المشكلة كانت فيها هي وازاى ها يقدر يتخلى عنها وهى ايه ممكن يحصلها لو قالها كدة ؟!

وبدأ فعلاً يبعد عنها لأنه مش قادر يواجهها ولو للحظة واحدة وهى بتحاول توصله ومش عارفة تعمل ايه ولا ايه اللى حصل عشان يبعد عنها فجأة كدة ومن غير اى اسباب تريحها !!!

مابقاش يكلمها ولا يطمن عليها فين حبه وفين خوفوا عليها .. بالسهولة دى يبيع حبهم .. بالسهولة دى يتخلى عنها فى اول الطريق .. حست انها تايهة ومش لاقية إجابة لأسئلة كتير جواها .. هتموت من الحيرة والاستغراب .. حولت توصل له وتفهم ايه اللى حصل وليه هو بعيد بالشكل الغريب ده فين كلامه عن مستقبلهم واحلامهم بس للاسف قعدت فترة طويلة ماتعرفش عنه اى حاجة .

ومرة تانية القدر جمعهم ببعض بس للحظة واحدة لما شافته ودموعها نزلت ووقفت مذهولة مش عارفة ترد ولا تتكلم ولا حتى تبص فى عينه زى زمان ..ولما خدها فى حضنه .. حست باحساس غريب ..فرحت وارتاحت أووى وزعلت وتعبت جدا .. كان نفسها تقوله ماتمشييش .. ماتهدش حياه بنينها واتمننها مع بعض مش هينفع اكملها لوحدى بس للأسف هو انسحب وسافر وسابها !!! حضنه قواها جداً وضعفها جداً جداً.. وبعدها قررت انها تقبل اول عريس يتقدم لها .. وقبلت احد من غير حتى ماتشوفه .. وكملت معاه حلم مش بتاعه ..

بس للاسف ماقدرش هو كمان يكمل معاها حلمها لانه كان مريض ومات بعد ماحست ان الحياه رجعت تضحك لها..

وعاشت اسوأ ايام حياتها واتملك اليأس منها تماماً وخلاص فعلاً مبقتش قادرة انها تحب اى حد تانى ومش عايزة تدخل فى اى علاقة وبدأت تحس انها ملهاش نصيب انها ترتبط بأنسان تحبه ويصونها ويحافظ عليها !!!...

وبعد فترة كبيرة من اليأس الكامل من اى علاقة حب او ارتباط بدأت ترجع لشغلها وترجع لنفسها من جديد وتركز فى شغلها وبس وبعدها حست بزميلها فى الشغل نظراته مختلفة .. بس هى كانت بتكذب نفسها ماكنتش عاوزة تدخل فى اى علاقة وكانت مرعوبة من تجاربها القديمة وحبها اللى ضاع وجرحها اللى حسة انه لسه ماتقفلش ..بس فى الاخر قالت وماله لو هو بيحبنى وبيخاف عليا .. ممكن ليه لا .. وابتدت تقرب .. كانت عايزة بس تستقر وتعيش حياة هادية مافيهاش مشاكل وكمان ده شكله بيحبها يعنى هيعيشها فى امان وهياخد باله منها.


وفعلاً اتقدم لها زميلها ده وكانت خايفة من جرحها القديم وخايفة لا تتجرح تانى .. بس هى كانت عاوزة تستقر وتعيش حياه هادية فى امان .. وافقت وتمت الخطوبة .. اتعودت عليه وبدأت تتأقلم معاه وتحكيله ويحكيلها ..

وفى يوم قرر يقولها انه يقدم ميعاد الفرح وهى وافقت .. نزلوا اشتروا مع بعض الفتسان والبدلة وحجزوا المكان.. وفى يوم الفرح صحيت وكلمته واتطمنت عليه .. اتفقوا على شوية حاجات .. وساعة ماوصلو للقاعة زغاريد وناس بتسقف وترقص واغانى بصوت عالى وهى قلبها بيدق جامد .. كانت مبسوطة ومرتاحة أووى ..

خلص الفرح ..

وكان هوا دا اليوم اللى بتحلم بيه أى بنت وهى دى اللحظة اللى اى بنت تتمناها وهى رايحة لبيت جوزها اللى ها يقدرها ويحافظ عليها ويحبها ...

اجمل عربية كانت عربية الزفة وكلها ورود جميلة تستاهل اجمل عروسة فى الدنيا وتحتفل بيها وتزفها لحد البيت الجميل اللى ها تعيش فيه ..

فجأة !!!

"اصطدام سيارة الزفة بشخص يعبر الطريق الذى تسير عليه الزفة"
.
.
.
.
نزل العريس والعروسة فى مشهد مرعب عشان يشوفوا ايه اللى حصل ؟!

وفجأة صرخت العروسة صرخة هزت بيها كل اللى حواليها بكلمات مافهمهاش الا الشخص دا بس !!!

"حبيبى ، حبيبى ، حبيبى اوعى تسيبنى تانى انا مش هقدر اعيش من غيرك ابداً ولما اتفارقنا قبل كدة كان غصب عنك وانت اللى اخدتنى فى حضنك لأنك كنت بتحبنى ومش عايز تسيبنى ابداً ومكنتش فاهمة حاجة لكن دلوقتى مش هسيبك من حضنى ابدأ لأنك حبيبى وهتفضل فى قلبى دايماً ، ليه مكتوب علينا الفراق يا اجمل حاجة فى حياتى بسببنا وغصب عننا ؟! ليه ؟!

حبيبى لما اتفارقنا زمان اتفارقنا وانت واخدنى فى حضنك لأنك كنت أقوى منى وحافظت عليا لكن دلوقتى هنتفارق وانت اللى فى حضنى لأنك مش هتقدر تحافظ عليا بس اوعدك انا هحافظ عليك للأبد ... جوايا "



"اذا امتلكت القرار بفراق شخص عزيز عليك لا تفارقه ابداً ايا ًكانت الاسباب لأنه يوجد الموت وهو اقوى منك ليفرق بينك وبين هذا الشخص وفى هذه الحالة ستندم على انك فارقته وستبكى عليه"



فكرة واخراج :
اسلام منير

تأليف وكتابة :
اسلام منير - هيا حسن


اسلام منير
http://islammounir.blogspot.com
هيا حسن
http://hayahassan.blogspot.com

انا نفسى ابقى بوذى (اول طريق الالحاد) ...

فضلاً... دعنى اولاً ان اوضح بعض الافكار التى اراها مفيدة فى موضوعنا :

- الحرية هى قنبلة تكنولوجية فى غاية التقدم اذا عبث بها الجاهل انفجرت فى وجهه ...
- القمع والتحجيم والتحديد فى كل شئ هو امتع اسلوب لحياة اى انسان بلا هدف ...
- افضل وسائل الدفاع عن النفس هى القوة أما السب واللعن هم اضعف وسائل الدفاع عن النفس ...
- تكفير الغير هو اضعف وسيلة للمؤمن للدفاع عن دينه ...
- الرسالات السماوية هى اليهودية والمسيحية والاسلام بترتيب النزول ...


ندخل فى الموضوع ...

ربما يكون الموضوع اصغر من مقدمته لكنى اريد ان استفز شئ ما فى بداخلك لأعرف اجابتك وقناعتك بشئ ما ...

كثيراً ما اجد مسلمين ومسيحيين فى وقتنا هذا وقد زادت مساحة الحرية لديهم الى طرق مجهولة ومبهمة وكأن الحرية هى شئ غير محدد وبلا نهاية !!

الكثير زادت لديه القناعة ورسخت لديه فرضية ان هناك اديان "ارضية" يجب علينا التحدث عنها وايضاً احترام حرية الاقتناع بها!!!!

كيف ؟!
نحن نحترم اى اعتقاد اياً كان لكن هل نحترم اعتقادات لا تعترف بأن الله سبحانه وتعالى هو خالق الكون ؟!
انا شخصياً لا احترمه حتى اذا قيل اننى متخلف !!!

سؤالى الذى اريد طرحه على كل شخص اياً كان معتقده من ديانات "سماوية" ...
ما هى نظرتك الى الديانات غير السماوية التى اخترعها الانسان مع كامل الاحترام لها بالطبع لكن ما نظرتك لها من جانب انك يمكن فى يوم من الايام ان تقتنع بها ؟!

هذا الموضوع يطرح تساؤل معين لأننى اجد الكثير تختلط عليه جميع المعتقدات ويساوى بين الرسالات السماوية والرسالات "الارضية" واريد ان اصل الى اجابة صريحة !!!

واريد ان اعرف اذا قلت لك "انا نفسى ابقى بوذى" ماذا ستقول لى ؟!
ولماذا ستعتبرنى مجنوناً اذا اعتبرتنى كذلك ؟!

هى بقت سهلة اوى كدة اننا نقول "الاسلام والمسيحية واليهودية والبهائية والبوذية" ؟؟
لو هى دى الحرية يلا نبقى بوذيين كلنا !!!!!!!!!!!!!!!!!!!!