الخميس، ١٧ ديسمبر ٢٠٠٩

ضحايا العيد - مصطفى ماهر واسلام منير


هو انا لازم افرح فى العيد .. طيب ماناس كتير فرحت ,خدوا ايه .. الشاب العطلان اللى عنده 30 سنة عدى عليه 30 عيد وفرح فيهم .. خد ايه فى الاخر؟ اهو قاعد زيه زي الرصيف اللى قاعد عليه وعقلة زيه زي الاسفلت اللى ماشي عليه , اسود من كتر الحيرة والقرف اللى شافو منها (من مصر) واهو عنده 30 سنة ولسة ماشتغلش لكنه فرحان !

اه يا مصرنا اللى كل عيد نشوفك عاجزة اكتر واكتر لحد ما يصبح يوم وانتى مش بيننا.

اه من الام اللى عايشة فى منطقة عشوائية وكل عيد يفوت عليها يموت واحد من ولادها بمرض لعين.


الموظف اللى مرتبه 500 جنيه وعنده طفلين المفروض انه يفرحهم فى العيد ويجيبلهم لبس وعيدية .. طب ده مين هيفرحه ومين هيديلة عدية ده مش بعيد يكون مخصوم منه عشان الحكومة تقدر تجمع مكافأة العيد الى بتوزعها على الموظفين كل سنة .

اه من عم سيد اللى سريره الرصيف ومخدته الحجر لما تتغير أحذية اسياده فى كل عيد بيفوت عليه.

اه من غربة الفقير فى بلده وهو وسط اهله ولا عمره قدر يدخل عليهم فى عيد ولو بكيس لحمة.

اه من موظف الحى اللى كل عيد يفوت عليه يملا دولاب ولاده بالحرام.


حتى المنتخب اللى حاول يفرح السنة دى بالمونديال وفشل , هيقدروا يفرحوا ازاى بالعيد اكيد زمانهم دلوقتى محبطين زعلانين مقهورين خاصةً لانهم مش هياخدوا مكافأة العيد ودول زى مانتوا عارفين محدودي دخل فلازم يزعلوا لما يخسروا عشان ده اكل عيشهم ورزقهم الوحيد , بس فرحة ماتمت خدها واد جزائرى حقير .

اه لما كل عيد نفرح بيه ناخد على قفانا ونسكت.


حتى الواد عضو المجلس بتاع الدم الفاسد , ده كان كل عيد يفرح مع اهل الدايرة ويحقق كل مطالبهم .. ده اكتر حد حالة تضايق اتحكم عليه 3 سنين سجن غيابي , الظلمة سابوه يسافر وحكموا عليه من غير ما يعرف .. طب ده يفرح ازاى بالعيد خاصا انه فى اوروبا وهناك العيد مش زي مصر خالص انا بقترح يسبوه يرجع يعيد ويرجعوه تانى اوروبا عشان العدالة تتحقق .

اه على ابن المسئول اللى كل عيد يسافر اجازته بدم واحد م الغلابة.

اه لما تبقى امنية الانسان ان كل عيد يفوت عليه يدعى يوم الوقفة انه يقدر يجيب كفن لولد من ولاده.

اااااااااااااااااه ... والله حرام !!!


كل عام وانتم بخير !!!

اسلام منير - مصطفى ماهر
26-11-2009
4:00 AM

ليست هناك تعليقات: