احب اقولك اولاً الف مبروووك على النجاح والتفوق والمركز الاول فى الثانوية العامة ...
- الحمد لله والشكر لله وكل دا بفضل ربنا اولاً ثم والدى (شيخ الدحاحين) ووالدتى
ممكن تعرفنا بنفسك اكتر يا سعيد ؟؟
- انا اسمى سعيد الفـرايحى وشهرتى سعيد ابو نجاح من عيلة الدحاحين قرية ابو كتكوت مركز البيضة جنوب غرب مارينا ووالدى مرشد سياحى على قد حاله ووالدتى فلاحة بسيطة وعندى 10 اخوات بنات و 9 ولاد وعايشين ...
قوللى ازاى قدرت توصل للمجموع اللى انت جبته دا ؟؟
- بص الموضوع مش صعب اوى زى ما الناس متخيلة كدة وكل اللى عملته انى بجتهد واعمل اللى عليا...
كنت بتذاكر كام ساعة فى اليوم ؟؟
- ههههههههه (ضحك ضحكة ساخرة) وقاللى على فكرة هما 4 ساعات فى اليوم بس اللى بذاكر فيهم وباقى اليوم كنت بلعب واتفرج على التليفزيون والعب بلاي ستيشن ...
ازاى كانت طريقة مذاكرتك ؟؟
- الناس متخيلة انى بقفل عليا الباب واقعد اذاكر وبس واعلم حاجات غريبة كدة لكن لأ دنا بذاكر ونا قاعد مع العيلة كدة متجمعين ويمكن ساعات قدام التليفزيون كمان !!!
انت شايف مستقبلك ازاى بعد المجموع اللى جبته ويدخلك اى كلية ؟؟
- بصراحة انا لسة بفكر ادخل ايه بالظبط بس قربت استقر يعنى قريب جداً بس اهم حاجة انى طلعت الاول على الجمهورية ...
شايف انك لما طلعت الاول دا انجاز ولا انك تدخل الكلية اللى انت عايزها ؟؟
- طبعاً انى جبت المجموع دا اكبر انجاز وتقدير لجهدى اللى عملته فى السنتين انما الكلية خير وبركة يعنى هادخل اللى انا عايزه ...
كنت بتاخد دروس ولا بتذاكر من الكتاب ؟؟
- ممممممممممم (بعد تفكير طويل) قاللى انا بصراحة يعنى كنت باخد دروس لكن برده انا كنت بذاكر من الكتاب والتطبيقات وهما دول سر نجاح كل طالب متفوق...
لاقدر الله كان مجموعك قل فى السنة التانية عنه فى السنة الاولى كان ممكن تعمل ايه ؟؟
- انا فعلاً ترتيبى كان هاينزل من الاول للتانى لولا انى اجتهدت وعملت اللى عليا الا كنت اتضايقت اوى وكان ممكن يأثر بالسلب عليا ...
انت شايف طموحك ازاى بعد ما خلصت المرحلة دى من حياتك ؟؟
- ايه يا استاذ الاسئلة دى اللى مالهاش اجابة دنا بقولك انا لسة مش مستقر اوى على الكلية تقولى طموحك ايه !!!
طيب انت شايف المرحلة الجاية فى الجامعة هاتبقى شكلها ايه بالنسبة ليك ؟؟
- اسئلتك بقت رخمة بس اكيد هذاكر واجتهد زى الثانوى وهانجح واتخرج وابقى شخصية ناجحة فى المجتمع ...
تحب تقول ايه للناس اللى ساعدوك على تفوقك دا ؟؟
- ووالدى ووالدتى ليهم كل الفضل انى اشكرهم على مساعدتهم ليا انهم كانوا بيوفروا لى الجو المناسب اللى اقدر اتفوق فيه كدا ...
نصيحة تحب توجهها لأى طالب داخل ثانوية عامة ؟؟
- احب اقوله سيبك من الكسل اللى فيك دا وانساه شوية عشان مستقبلك يبقى احسن وتدخل الكلية اللى انت عايزها وذاكر بجد مش مهم تذاكر كتير والعب زى مانت عايز وحب امك وابوك عشان يرضوا عنك كدة وتنجح وتجيب مجموع والموضوع مش صعب بس انت تبطل الكسل اللى بقى فى الشباب اليومين ول...
هذا النموذج سوف تراه كثيراً خلال الايام القادمة على مختلف القنوات بأساليب مختلفة لأنه يتكرر كل عام ونفس النصائح ونفس التفكير ونفس الكثير من السطحية ...
الجنازة حارة والميت ...... التعليم
المشاركات
ليست هناك تعليقات:
إرسال تعليق