هو بابا ديمقراطى بجد ؟؟

غصب عنى بفكر فى الموضوع ده دايماً والمشكلة ببساطة انى كشاب وبحب التنطيط وبحب الاختلاف والحاجات دى بقرى جرايد تتميز بانها جرايد وسيطة او مش معارضة وخلاص يعنى وبابا بيقرى جرايد قومية وانا اخبارى من الجرايد دى وبابا اخباره من الجرايد القومية وببساطة انا معرفش اغيره واقوله اقرى الجرايد دى لأنه قضى اغلب عمره فى شغله بيقرى الجرايد دى وانا كشاب قضيت الفترة الصغيرة دى من حياتى بقرى الجرايد التانية دى فأنا مقتنع بأفكارى اللى غير افكار بابا طبعاً اللى مقتنع بيها !!!
طيب وبعدين ؟؟ ... بصراحة يعنى بابا طلع ديمقراطى انه بيخلينى أقرى الحاجات دى ويمكن ساعات بيخلينى اتناقش معاه فى اختلاف ارائنا بس ساعات مش دايماً طبعاً بس الحمد لله كفاية عليا كدة.
بس المشكلة كلها هو بابا ديمقراطى بجد ؟؟ ولا يوم ما اتحمل مسئولية اى حاجة كبيرة فى البيت ولا حتى فيه اى قرار ممكن ناخده انا وهو هاياخد هو القرار بأفكاره هو وانا ولا كأنى موجود ؟؟
هو بابا بيناقشنى بس كدة فى افكارنا المختلفة لمجرد التسلية ولا ممكن فى يوم من الايام يقتنع بفكرى ؟؟
يعنى بصراحة انا حاسس انى زى المعارضة وبابا زى الحكومة وانا عايز اعمل اضراب واعتصم واقعد اتناقش معاه على امل انه ممكن يقتنع بفكرى ولو مرة واحدة بس وبابا زى الحكومة مقتنع بأفكاره هو بس وبينفذ كل حاجة من غير ما ياخد رأيى لأنه مش مقتنع بيه وانا بابقى فرحااااان اوى لما بابا ساعات يقولى دى فكرة كويسة اللى انت قلتها دى بس ايه اللى بيتنفذ فى الاخر ؟؟
برضه رأى "بابا" ... يبقى العيب فيا ولا فـ "بابا" ؟؟