يانهار .... !!! اختى بتروح السـيـنـمـــا !!!

انت شايف ان الموضوع عادى اوى كدة ؟؟:S
يابنى وايه يعنى ما كل الناس بتروح السينما وانت وانا واى حد بيروح السينما ايه اللى حصل يعنى ... !!!
ماهى دى المشكلة ماهى لو زى الناس ماكنتش زعلت ويمكن كنت اروح معاها كمان :S
نعم ؟؟ يعنى ايه لو زى الناس !!
بص انا هاحكيلك على كل اللى حصل بصراحة وساعتها قوللى عادى ولا مش عادى...
لما كنت فى تانية جامعة كنت قاعد مع شوية من صحابى فى الجامعة واتعرفت على بنت كدة كانت قاعدة مع واحد اعرفه وهى كانت قريبته المهم اننا اتعرفنا على بعض واتشدينا لبعض بعد كام قعدة كدة...
البنت بصراحة امورة ورقيقة وشكلها بنت ناس بس مشكلتها انها منفتحة شوية ... يعنى شويتين تلاتة يعنى من الاخر تتصاحب بس مش للجواز يعنى ...
بمعنى انى يوم ما هاصاحب حد فى الجامعة هاتبقى هى دى لغاية ما اخلص جامعة واقلبها انما لما افكر فى الجواز طبعاً لو مفيش غيرها مش هايحصل...
المهم اننا جينا من فترة كدة كنا خارجين مع بعض انا وهى بس زى كل اسبوع يوم الخميس (اليوم المفترج لكل اللى زينا) وطبعاً زى كل اللى مقضينها صحوبية بس زينا طلعنا على السينما ;)
روحنا السينما وجبت تذاكر مع انى يمكن معرفش انا داخل فيلم ايه اصلاً المهم انى داخل السينما وخلاص ...
ودخلنا وظرفت الراجل اللى بيدخلنا خمساية كدة عشان يظبطلنا قعدة حلوة وفى الاخر خالص عشان نبقى بعيد عن اى حد والراجل عارف احنا بنحب نقعد فين عشان اتحفظنا خلاص (بروح كل اسبوع لازم يحفطنى)...
بعد لما دخلنا وقعدنا بعيد وكله تمام الفيلم ابتدى والنور طفى وكله كدة بقى تمام ;)
- الحتة دى بصراحة مش هاقدر اوصف ايه اللى بيحصل فيها بس انت افهمها بقى -
ماتستغربش اوى كدة لأن اساساً كل الناس كانت زينا كدة وكله قاعد بعيد عن التانى عشان نفس السبب اللى احنا قاعدين بعيد عشانه :D
بعد لما قعدنا وظبطنا نفسنا وانا وهى اتبسطنا جداً وخدنا Break فى النص وكدة وقبل ما الفيلم يخلص بشوية صغيرين ساعة لما بنلاقى الفيلم هدى كدة شوية (انت فاهم بقى)...
قعدنا زى الناس قاعدة محترمة وكل حاجة عشان لما النور يفتح يبقى احنا فى السليم (Y)
شوية صغيرين والفيلم خلص والنور ولع والناس كلها فى السليم (خبرة بقى) :D
إلا اتنين بس ولد وبنت باين عليهم لسة مش خبرة فى الموضوع (اكيد لسة داخلين الجامعة جديد) ومش عارفين امتى يعرفوا ان الفيلم قرب يخلص :D (هايخدوا نصيبهم بقى)
النور فتح عليهم وهما فى وضع مش تمام طبعاً وتخيل انت المنظر :S:S
الأمن كله دخل والولد بيزعق ويقول ازاى ومش ازاى ومفيش حاجة وخدوهم عشان يشوفوا هايعملوا ايه معاهم !!!
زى الناس كلها انا بابص عليهم ببراءة جداً واقول "ياعينى معلش لازم الواحد عشان ياخد خبرة يتقرص مرة مرتين"...
والبنت مكسوفة جداً وحطة وشها فى الارض من المنظر (طبعاً السينما كلها بتتفرج عليهم)!!!
فجأة ... 
هاقع من طولى 
يانهار اسود !!!
اختى !!!!!!!!
مصيبة ... كارثة !!!!
اختى انا بتدخل سينما !!!
طاب وماما وبابا هاقولهم ايه (شفت اختى مع صاحبها بيعملوا ايه فى السينما وانا بعمل نفس اللى بيعملوه ) !!!!
وازاى هاتجرأ اروح اقول انا اخوها واطلعها من المصيبة دى !!!
انا ولد اروح واعمل اللى انا عايزه ... هى تروح ازاى !!!
واطلعها ازاى !!! دى عايزة الدبح !!!
اختى انا بتروح سينما !!!
اختى ... اختى ... !!!

مش محتاج اوضح ان القصة دى طبعاً محصلتش معايا لكن الاهم انك تفهم المغزى ورا الحكاية البسيطة دى ...